Trist syn på Alsaker Brygge

Siste status kort oppsummert: 


• Brannen er under kontroll.
• Fem av åtte bygg er totalskada. 
• I to av dei andre bygga er det alvorlege vasskadar.
• Store styrkar har bidratt i sløkkingsarbeidet - frå både land og sjø. 
  
• Politiet har starta etterforsking. Per no veit dei ikkje årsaka til brannen.

Det var laurdag ettermiddag at det byrja å brenna i Alsaker Fjordbruk sitt splitter nye kontorbygg på kaikanten på Onarheim. Brannvesenet skal ha fått inn melding om brannen klokka 13.39. 

Bilete og videoar tatt av folk på staden viste kraftige flammar frå taket. 

Ingen sakna eller skada 

Bergens Tidende kunne heldigvis melda at det ikkje var personar igjen i kontorbygga, noko det hadde vore litt uvisse om heilt i starten. Ingen personar er meldt sakna eller skada etter brannen. Dei som var i bygget skal ha blitt raskt evakuert då brannen blei oppdaga. 

I 15-tida fortalde «Tysnes» sin utsende journalist, Marthe Macody Tufte Lund, at det var stor røykutvikling i området og mykje vind. På det tidspunktet var fleire brannbilar komne til staden, i tillegg til ambulanse. Kystvakta og redningsskøyte var på veg for å bistå. 

På grunn av den kraftige røyken frå brannen, som spreidde seg raskt og langt med vinden, gjekk politiet ut med oppmoding om at folk i området burde halda seg innandørs og lukka vindauga. 

Ifølgje ein tipsar i Våge kunne ei stram røykelukt merkast heilt dit. 

Stort sløkkearbeid - frå land og sjø 

Alsaker sine nye kontorbygg ligg tett i tett på rekkje, og naudetatane uttalte tidleg at det var spreiingsfare. Og slik gjekk det, diverre. Til slutt brann det i sju av dei åtte kontorbygga.

Brannstyrkane på land fekk god hjelp frå fleire båtar med vasskanonar, mellom anna to frå firmaet Buksér og Berging. Dei var i Husnesområdet og hadde såleis nokså kort veg bort til Onarheim. 

Klokka 17.28 melde politiet i loggen sin at det var kontroll på brannen, men at det framleis brann i bygga. I 18-tida fekk BT opplyst at brannvesenet var over i ettersløkkingsfasen.

Det som då stod att av bygningsmassar minna nærmast om ein spøkelsesby. 

– Veldig trist 

Arbeidet med å byggja den nye, høgreiste kontorrekkja på kaikanten har gått føre seg i fleire år. Tusenvis av arbeidstimar er lagde ned frå både lokale og tilreisande arbeidsfolk. No er fem av åtte bygningar totalskada, og to av dei andre har alvorlege vasskadar. 

– Bygga var heilt nye, og dei blei nettopp tatt i bruk. Dette er veldig trist, seier ordførar Synnøve Bakke til BT. 

Samfunnskontakt hos Alsaker Fjordbruk, Kristian Råsberg, har uttalt til NRK at dei no må ta i bruk det gamle kontorbygget på området. 

Blir etterforska 

Politiet veit førebels ikkje korleis brannen starta. Dei har starta etterforsking. 

– Me har starta avhøyr av dei som jobbar der. Det skal også gjerast ei åstadsundersøking med kriminalteknikarar når det er blitt kaldt på staden. Det skjer truleg ikkje før starten av neste veke, seier operasjonsleiar Morten Rebnord til NRK.