Tysnes Musikklag spelte mange fine julesongar i Lundebygda og.
Borna leikte seg og sprang rundt med stjerneskot.
Og så kom nissen! Lunde-nissen delte ut godteposar til borna, noko som alltid er populært.
Folkemengda stod tett for at alle borna skulle få helsa på nissen.
Etter nissevitjinga var neste post på programmet at noko skulle verta avduka. Dette viste seg å vera eit skilt for drivstoffpumpene ved butikken. Det høgreiste skiltet hadde dessutan fått ein litt spesiell tekst: "Bymann og bonde, velkommen til Londe", kunne ein lesa på det.
Siste innslag på programmet var ganske hemmeleg. Knut Nesland, leiar i Lunde bygdalag, informerte om at det vart fakkeltog ned til Fiskevatnet. Mange vart med og på dette, og venta spent langs vegen medan Anne-Merete Fjeldstad sa nokre "magiske ord", som stava lys. Og plutseleg fekk ein sjå kva overraskinga var...
Eit enormt, opplyst juletre på andre sida av vatnet! "Det er nok gode 20 meter høgt, eg veit faktisk ikkje heilt", sa Knut Nesland. Bygdelaget kan vera godt nøgd med seg sjølv, for overraskinga både såg og høyrtes ut som om den fall i smak. "Alle dei andre bygdene har jo fått seg juletre etter kvart, så me og måtte jo ha eit", lo Nesland.
Folk vart ståande og beundra det nydelege synet lenge etterpå. Det vart ein ekstra vellukka kveld for bygdelaget, sidan vatnet låg heilt stille.
